Kimmt daher die Wintazeit, freun si alle Mannaleut,

gengan's außi auf`n Anga, mit da Eisboh tean's ofanga,

dass sie fertig wird und stimmt, bis die große Kältn kimmt.

Auskehrt schö und d`Wandl gricht, hat die Eisboh erst a Gsicht !

An Spritzkruag brauchst und a an Hobi, nacha werds erst fein und nobi

und da Eisstock kriagt a Wax, bis a tanzt auf Huiraxdax.

Schiaßzeit is, wia`s Weda mag, meistens am Stefanitag.

Auf d`Mittagzeit wird vergessn, d`Hausfrau wart dahoam mit`n Essn,

doch da Moar schreit mit sein Baß : „Schneidermanndl, no a Maß !“